 |
|
|
|
|
|
|
|
II FRESH OPPORTUNITIES biltzarra VIAk
(Promoción del Aeropuerto de Vitoria) antolatu zuen Miamiko Nazioarteko
Aireportuaren (MIAren) babesarekin. Biltzar horrek produktu galkorren
negozioaren liderrak bildu zituen merkatu berrietara heltzeko, logistika
optimizatzeko eta Estatu Batuetako gobernuaren arau berriak betetzeko
estrategiak aztertzeko xedearekin. Biltzar horretan 150 ordezkarik baino
gehiagok hartu zuten parte, batez ere Latinoamerikakoak eta Estatu
Batuetakoak, baina baita Europakoak, Asiakoak eta Ekialde Ertainekoak
ere. Biltzarrean, 40 txostengilek eta moderatzailek gai ugari eta
askotarikoak jorratu zituzten.
Biltzarra hasteko, presidenteak, Bill Spohrer-ek, Jesús Mª de Lapatza Urbiola,
VIAko (Promoción del Aeropuerto de Vitoria) presidentea, aurkeztu zuen. Lapatzak
bertaratutako guztiei ongietorria egin zien eta Jorge Arrizurrieta, Florida
Foreign Trade Area Association elkarteko zuzendari exekutiboa, aurkeztu zuen.
Azken horrek biltzarraren aurkezpen laburra egin zuen.
Manuel Aragón-ek, Teqflor enpresako presidenteak, saioaren hasieran esan zuen
"ondasun galkor nagusia denbora dela", eta gero eta denboraren eragina jasaten
duten "produktu galkor berri" gehiago daudela, hala nola jostailuak eta zuntzak.
Gert-Jan Jansen-ek, YDL Management Consultants enpresako bazkide batek,
Latinoamerikako erronka handienetako bati buruz hitz egin zuen, hots, Afrikako,
Pakistango edota Indiako konkurrentziari buruz. Latinoamerikako herrialdeek gehien
esportatzen dituzten produktuak honako hauek dira: haragia (Argentina), legatza
(Txile), krabelinak (Kolonbia), arrosak (Ekuador), zainzuriak (Peru) eta guaiabak
eta mangoak (Brasil). Gainera, Michelle Kung-en (Taiwango Merkataritza Bulegoko
zuzendaria) arabera, produktu galkorrak kontsumitzen dituzten merkatu potentzialen
kopurua handitzen ari da. Adibidez, Taiwanek 23 milioi biztanle ditu eta urtero 7,1
bilioi dolar gastatzen ditu produktu galkorren inportazioan. Bestalde, Kirk Kobayashi-k,
Japoniako Kanpo-Merkataritzako Erakundeko ordezkariak, adierazi zuen erakunde horrek
inportazioa bultzatzen duela, bi norabideko inbertsioa baita. Japonian urtero 46 bilioi
dolar gastatzen dira elikagaien inportazioan, %34 Ipar Amerikatik datorrelarik eta %7
besterik ez Latinoamerikatik. Bunny Schreiber-ek (Miamiko Nazioarteko Aireportuko
marketin-aditua) adierazi zuen Estatu Batuetara doazen loreen %85 Miamira heltzen
direla, bai eta arrainaren %65 eta frutaren %42 ere. Miami hobetze-plan batean murgilduta
dago orain. Horri esker, 300.000m2 inguru gehiago erabili ahal izango dira produktu
galkorrak manipulatzeko. Halaber, Miamiko Aireportuak mintegi ibiltari sail bat
zuzentzen du. Mintegi horien xedea da ekoizleei euren karga nola prestatu behar duten
eta Estatu Batuetara eta Europara nola merkaturatu behar duten irakastea. Logistikari
buruzko eztabaidaren barruan, José María Navajas-ek, Decoexsa Vitoria enpresako zuzendari
kudeatzaileak, azaldu zuen Decoexsak Gasteizko Aireportuan duen terminala Europako
bigarren handiena dela. Halaber, entzuleak harriturik utzi zituen esan zuenean
"horrek ahalbidetzen duela manutentzioa oso denbora laburrean egitea, hots, 2 edo 3
ordutan salgaiak hegazkinez heltzen direnetik Europako merkatuetara kamioiez edo
trenez abiatzen diren arte".
Ordezkariek Estatu Batuetako FDAk (Food and Drug Administration erakundea) 2002ko
bioterrorismoari buruzko legearen ondorioz ezarritako arau berrien inguruko kezkak
aditzera eman zituzten. Arau berri horiek Michael Wright-ek (portu agintaritzako
zuzendaria), Jeffrey O. Baldwin-ek (Miamiko aduana saileko zuzendaria) eta John Sandlers-ek
(Estatu Batuetako FDAko inportazio-programaren zuzendaria) azaldu zituzten. Arau horietako
baten arabera, Ipar Amerikako elikagai-inportatzaile guztiek salgaiak heldu baino egun bat
lehenago salgai horiek helduko diren berri eman behar diete agintariei. Beste arau batek
Estatu Batuetan giza- edota animali-kontsumorako elikagaiak fabrikatzen, prozesatzen,
ontziratzen edota biltegiratzen dituzten estatuko eta nazioarteko enpresei eskatzen
die FDAn izena eman dezaten 2003ko abenduaren 12a baino lehen. Lauren Pérez-ek (Sandler,
Travis & Rosenberg) azpimarratu zuen produktu galkorren merkataritza lehiakor baina
errentagarrian jarraitu nahi duten enpresentzat arau horiek betetzea oso garrantzitsua
dela. Beste alde batetik, Eric Andrews-ek (Martin Aviation Group) arau berrien inguruan
dituen kezkak jakinarazi zituen. Andrews-en kalkuluen arabera, prozesu berri horiek
kostuak %100 eta %200 bitartean handituko lituzkete, aldi berean kontsumoa murriztuko
litzatekeelarik. Bere ustez, hezkuntzak zeregin garrantzitsua du, alderdi guztiek arau
berri horiei buruzko informazioa jaso behar baitute.
Ricardo González-ek, VIA Promoción del Aeropuerto de Vitoria enpresako zuzendariak
(VIA TIACAren 2004ko Air Cargo Forum-aren egoitza izango da), II Fresh Opportunities
biltzarra amaitu zuen bertaratutako, txostengile eta antolatzaile guztiei eskerrak emanez.
Halaber, biltzarra aire-garraioaren sektorean izaten ari den arrakastaz eta oihartzunaz
asko pozten dela adierazi zuen. González-ek esan zuen, gainera, biltzarraren ondoren
galdera berriak sortuak zirela, eta galdera horiek III Fresh Opportunities biltzarrean
eztabaidatu ahal izango direla.
|
|
|
|
|
|
|
|
Lehiarako Abantailak
Kokalekua
